任睇No.1
  • 29º
  • 81%
  • 2022年10月2日 星期日

古星輝 - GameFi點止講玩咁簡單|乜都5G

去年開始,外地遊戲界出現GameFi呢個新名詞,呢個字令遊戲產業嘅發展出現極大變化。GameFi全寫係Game Finance,中文名稱「遊戲化金融」,顧名思義係有金融元素嘅遊戲。GameFi係由DeFi(Decentralised Finance / 去中心化金融)、NFT及遊戲三者整合而成,即係同區塊鏈同NFT呢啲新經濟有關。

據統計,2021年就有超過500個GameFi類型嘅應用,較2020年多咗超過一倍,亦有機構嘅數據指出,截至去年11月GameFi嘅總投資額已超過25億美元,好多遊戲平台都密切留意呢個市場發展,準備推出GameFi遊戲。

GameFi嘅特色,係將傳統遊戲加入區塊鏈,玩家可以透過遊戲得到唔同嘅道具同角色,而呢啲嘢全部都可以NFT咗佢放上OpenSea銷售,繼而從中獲利。呢啲NFT除咗收藏之外,仲可以喺遊戲入面使用,提升玩家戰鬥力;而遊戲公司可以發行自己嘅虛擬貨幣,再放上虛擬貨幣交易所,吸引虛擬貨幣投資者投資,漸漸形成一個生態系統。
玩家邊玩邊賺 開創虛擬經濟

好多GameFi玩家都會透過Play-to-Earn(邊打邊賺)方式參與遊戲,透過銷售NFT或者投資遊戲公司發行嘅虛擬貨幣獲取收入。留意玩家進入遊戲之前,通常需要課金購買虛擬角色或者資產,形式類似入場費。

再講吓實際例子,有NFT界比卡超之稱嘅遊戲《Axie Infinity》,去年嘅收入就一度超越全球手遊收入冠軍《PUBG Mobile》,單月收入接近3.5億美元。呢個遊戲憑Play-to-Earn嘅理念,疫情期間吸引咗一批菲律賓及越南玩家,希望藉住玩遊戲,將各類道具NFT轉售至歐美玩家賺取收入,曾傳出有人月入過萬港元,成功開創出暢旺的虛擬經濟。另一方面,由《Axie Infinity》開發商推出嘅虛擬貨幣「AXS」喺2021年由1枚0.8美元升至高峰160美元,暴漲200倍!

記得5G初初推出嘅時候,佢極高速同超低時延嘅特色,令網絡對戰嘅體驗大大提升。如今再結合區塊鏈及NFT等新經濟元素,5G聯乘GameFi,唔係講玩咁簡單,勢為本地手遊界帶來新景象。
和記電訊香港執行董事及行政總裁
古星輝

hd