古星輝 - NFT高速發展愈變愈有|乜都5G

提起NFT,大家最關注嘅係成交價錢同成交速度,根據數據網站NonFungible嘅資料顯示,上星期NFT每日平均銷量唔到2萬個,同去年九月份每日22.5萬個比較,整體下跌超過9成!係咪代表NFT只係曇花一現嘅三個英文字呢?

事實係,NFT產業仍然處於高速發展階段,有報道指出,亞太區區塊鏈技術市場,現時以每年54%嘅速度增長。而好多公司都積極研究緊由元宇宙、NFT同加密貨幣等Web3產物帶嚟嘅新商機。
不可複製 方便認證

到底NFT係咪就係一幅大家成日見到嘅8-bit jpg圖咁簡單?大家有留意嘅話,一段短訊、一條聲帶、一個片段,甚至我上回提過嘅遊戲寶物都可以NFT化。近期有咖啡連鎖店表示,有意計劃將NFT作為會籍,持有人會擁有會員身份,於實體店或元宇宙享有不同福利。NFT不可複製、方便認證及轉手嘅特性,用嚟做會員認證相當合適。

今年初,台灣就有團隊推出咗一個號稱全球頂尖酒吧通用嘅NFT,示範收藏及升值以外嘅另一用途。手持呢個「會員證」,每個月去台灣、香港、上海、北京、韓國同日本嘅合作酒吧可以免費換四杯雞尾酒,甚至可以有購買珍貴稀有嘅酒嘅優先權,而持有人稍後可以參與部份計劃嘅投票,將NFT特點全面展現。另一點有趣嘅係,團隊今次發行1萬個NFT,令此NFT較難炒賣,確保所有會員都係真正愛酒之人。

上個月,香港一個好受歡迎嘅YouTube頻道亦都發行NFT,打正旗號以會員制做招徠,為忠實粉絲打造一個社群,並提供獨有福利,大家不妨留意日後佢哋呢個新式會員制能夠帶嚟乜嘢新意思。

近日又出現演唱會假門票新聞,其實要杜絕表演節目出現假門票,用NFT做門票既唔怕假冒,又有收藏價值,仲可以有啲後續活動,延續同觀眾嘅關係,有得諗。
和記電訊香港執行董事及行政總裁
古星輝
更多文章