任睇No.1
  • 27º
  • 94%
  • 2022年6月30日 星期四

古星輝 - 藝術展會的5G Wi-Fi佈局|乜都5G

隨著疫情放緩,社交距離措施逐漸放寬,市面氣氛漸漸熱鬧起嚟,城中多個規模盛大嘅國際及本地藝術展會,終於都能順利舉行。當中包括享譽國際藝壇嘅年度盛事「2022巴塞爾藝術展香港展會」(Art Basel Hong Kong 2022),以及全亞洲其中一個最大型嘅戶外NFT x 本地藝術展覽「ARTAVERSE」。

唔講大家未必為意,其實今年四月係香港推出5G兩周年,好開心見到5G逐漸應用喺城中各項大型盛事!好似呢幾日喺會展舉行嘅巴塞爾藝術展香港展會,由於要顧及疫情嘅關係,展會結合咗數碼平台同實體展會,有部份地方會用5G Wi-Fi,方便極速上網。其實早喺2019年,作為會展嘅牽頭營辦商,我哋早已經喺會展建構咗世界級5G公共流動通訊系統,所以有任何大型活動需要用到5G的話都超級方便。
有利作現場直播虛擬導覽

我哋今次幫呢項國際盛事提供部份流動寬頻服務,因應個別展商要求,用咗建設「小區Wi-Fi網絡」嘅方法,幫展商設計全面嘅Wi-Fi覆蓋,提供穩定流暢嘅專用5G Wi-Fi服務,配合展會嘅各種現場直播、虛擬導覽同網上導賞活動,向全球觀眾展示活動盛況。

另外,即將於6月3至12日喺中環海濱舉行嘅ARTAVERSE藝術科技展覽,同樣會採用5G Wi-Fi服務。呢個戶外展覽加上人氣歌手表演,結合NFT、元宇宙同埋以擴增實境、虛擬實境打造嘅沉浸式體驗,對流動頻寬有好高要求。我哋要喺短時間內,為超過15萬平方呎嘅戶外場地、幾十個由大貨櫃改裝而成嘅展覽館、逾百個合作單位,提供超高速又穩定嘅5G Wi-Fi。要做到全面流動通訊,事前要精準計算同部署,確保萬無一失,技術同經驗真係少啲都唔得。

例如基建方面,先要有10Gbps高速光纖專線連接至5G基站,為5G Wi-Fi服務提供強大後盾。另要適量加裝電訊設備,例如發射器、天線、5G路由器等,以發揮5G Wi-Fi嘅優勢。簡單嚟講,即係免拉線,即插即用,比傳統逐個位置拉線慳返唔少時間,而且無論係加設或租用5G路由器都好方便,總之係快靚正。對於只係舉辦幾日嘅大型戶外項目,流動寬頻成本效益高,而活動後嘅路由器又可以喺活動後重用,兩個字——「環保」。
和記電訊香港執行董事及行政總裁
古星輝

hd