任睇No.1
  • 29º
  • 81%
  • 2022年10月2日 星期日

古星輝 - 5G節能減碳有辦法|乜都5G

政府上月推出綠色債券計劃,巿場多咗好多人談論可持續發展、減碳同環保等概念。筆者早前出席咗一個研討會,同年輕人分享有關5G網絡如何節能,以及5G技術如何推動綠色科技項目嘅應用。

有資料顯示,5G嘅耗電量比4G高約七成,預期喺2020年至2030年10年期間,耗電量將急升達160%,主要因為構成5G網絡嘅元素,如大規模多輸入多輸出(Massive MIMO)系統、邊緣伺服器、毫米波機站等,對電力需求龐大。作為電訊商,我哋好注重環保,同網絡承建商研究咗好多方案,確保喺拓展5G覆蓋之餘,能夠節能減碳,保護環境。
採高效能天線及先進儀器

首先,我哋改變咗天線組件嘅配置,提升咗發射及接收訊號嘅效率,照顧同一樣嘅覆蓋,就可以減能約30%。 我哋又用咗高效能嘅天線,與傳統天線比較少咗好多電纜同配件,用喺照顧同樣嘅覆蓋,能夠節能達20%。換另一個角度嚟講,就係以採用相同電力嘅情況下,能提升覆蓋達15%。

此外,我哋採用先進嘅5G儀器,能將多個頻譜頻段,結合到單一無線電儀器,既可減少耗電量,又能保持一樣的網絡表現。 近年,我哋更加採用咗一個嶄新方案,透過人工智能,二十四小時全天候監察不同網絡頻段嘅使用量,喺深夜或者非繁忙時間,當好少人甚至無人用某頻段嘅網絡服務時,系統就會自動調節電力開關,可減少耗電量達25%。

總括而言,集以上各種方案於一身,可大幅減少公司5G網絡嘅耗電量達50%,而服務水平同客戶體驗維持不變。

除咗5G網絡本身要節能外,5G技術能有效推動綠色科技應用,加強節能減碳。例如5G高清會議方案,不但疫情期間方便大家在家工作,亦可減少不必要嘅出行,有效減低交通運輸的溫室氣體排放。

又例如車聯網嘅應用,對於建構可持續發展嘅未來一樣重要。車聯網係綠色智慧交通嘅重要一環,透過5G進行高速、低時延嘅互連,能準確有效控制交通流量,減少道路擠塞。少咗車,少咗塞車,即係少啲溫室氣體排放,對保護環境好有幫助。
和記電訊香港執行董事及行政總裁
古星輝

hd