任睇No.1
  • 32º
  • 67%
  • 2022年8月15日 星期一

古星輝 - 遊住船河歎5G|乜都5G

炎炎夏日,又係出海嘅好時機,對住無敵海景吹吹海風,少不免心血來潮想打卡開Live,去開遊船河嘅人都知,去到大海中心訊號通常唔多穩定,不過唔使等好耐,大家就可以遊住船河打卡睇片。

呢個其實係物理問題,現時4G同5G所用嘅頻譜主要屬於中高頻,頻段愈高穿透力愈低,喺市區應用問題不大,但到咗距離基站較遠或附近較多山嶺嘅範圍,訊號就會冇咁完美。如果要為廣闊嘅區域提供深度覆蓋,除咗密密加建基站之外,低頻段嘅頻譜亦相當重要。

政府早年已提出數碼紅利,即係停止傳統模擬電視廣播服務,騰出頻譜作流動通訊用途,而傳統模擬廣播所用嘅,正正就係700MHz呢段比現有4G同5G更要低頻嘅頻譜,呢段低頻頻譜喺去年10月已經完成競投,隨住模擬電視廣播喺舊年12月正式結束,亦象徵好快可以交到營辦商手上用嚟做5G服務,而業界傳聞預期最快喺本月底就會指配至成功競投嘅營辦商,我哋上星期更搶先公佈完成700MHz 5G頻譜嘅部署。
訊號範圍達離岸11公里

根據工程部同事嘅測試資料所得,700MHz頻譜提供到極具深度嘅5G覆蓋,初步測試與基站相隔遠至離岸11公里嘅範圍都可以收到訊號,例如南丫島深灣及西貢對出一帶海域,呢啲平日被山嶺遮擋訊號嘅地方,憑住低頻穿透力特強,好快就可以接收到5G訊號,屆時喺呢啲位置出海上網就再唔使煩,遊住船河歎5G不是夢。

既然700MHz頻譜可以提升5G覆蓋嘅深度,對一啲低密度住宅區嘅5G接收好有幫助,例如新界西北、中半山同九龍塘等。對於呢啲住戶,佢哋唔使再忍受又貴又慢嘅龜速寬頻,可以多一個更高速方便嘅選擇。覆蓋以外,多一個5G新頻譜嘅好處係營辦商可以將手上嘅5G頻譜,透過載波聚合夾埋一齊使用,提供更高速嘅服務,發揮頻譜最大效益。

同事話依家同供應商忙於測試支援載波聚合技術嘅5G Router,睇嚟唔使好耐就有得用喇。
和記電訊香港執行董事及行政總裁
古星輝

hd