記得六月中曾經預告過700MHz 5G頻譜準備就緒，同事亦已經完成有關部署。轉眼間6月底就收到有關當局嘅正式通知，營辦商喺6月30日可以逐步啟動700MHz 5G頻譜。全靠同事早已完成部署工作，我哋喺6月30日零時零分準時啟動700MHz 5G頻譜，成為首間啟動呢段新頻譜嘅電訊商，趕及慶祝香港回歸25周年，當晚喺網絡控制中心同啲工程團隊一齊見證住呢個啟動時刻，大家心情相當興奮，希望藉住呢個穿透力特強嘅新頻譜，為香港5G服務揭開新篇章。
之前提過呢段頻譜嘅好處係穿透力強，即使前面有座山都未必可以擋得住，換句話說營辦商可以打造廣域同具深度嘅覆蓋，有利推廣5G寬頻及其他商業應用，對發展智慧城市相當重要。
呢個新頻譜，除了有助提供廣域覆蓋，營辦商仲可以配合載波聚合（Carrier Aggregation）及動態頻譜共享技術（Dynamic Spectrum Sharing），喺特定嘅場景下，最佳下載速度表現可以倍升，將手上頻譜發揮最大效益。
科技網站實測下載快近3倍
日前有科技網站去咗粉嶺測試700MHz嘅5G服務，根據有關測試資料，喺有700MHz嘅情況下，下載速度比以前相差3倍！亦都有住喺低密度住宅嘅朋友同我講，有咗700MHz 5G服務，喺屋企廁所同閣樓都收到電話，親身體驗到深度覆蓋帶嚟嘅好處。
有一點大家要留意，呢段頻譜前身係用嚟提供模擬制式電視廣播，當轉換成提供流動通訊服務嘅時候，電視天線系統有可能仲會接收到呢個頻譜嘅訊號，如果天線系統係位於流動通訊基站附近嘅話，流動網絡嘅訊號有可能影響咗電視接收。假如各位發覺呢兩個星期電視接收有問題嘅話，就有機會係呢個問題，可能要搵師傅喺電視天線加裝一個濾波器喇。
和記電訊香港行政總裁
古星輝
;){kind=link}
;){kind=link}
;){kind=link}
;){kind=link}
;){kind=link}
;){kind=link}