任睇No.1
  • 28º
  • 83%
  • 2022年10月2日 星期日

古星輝 - 邊行邊賺NFT|乜都5G

近期難得好天氣,每逢假日總會想出外走走,放鬆一下平日急速的生活節奏。隨著近年醫學界表示每天步行8000至10000步可有助健康,大家陸續關注自己的每日步行數目,甚至有保險公司以每日步數與保險折扣掛鈎。我哋公司喺2019年更舉行員工慈善步行挑戰賽,鼓勵同事每日行多幾步,結果有同事締造咗一星期行足超過23萬步嘅成績,即係等如喺標準運動場行咗350個圈,相當厲害。

嚟到Web3年代再有新玩法,鼓勵大家每日行多幾步,呢個叫做STEPN嘅遊戲結合咗區塊鏈、SocialFi及GameFi元素,透過「move-to-earn」方式去賺取NFT。佢嘅遊戲方法相當有趣,玩家以賺取遊戲嘅原生代幣GST(Green Satoshi Token)為目的,用以購買不同款式嘅運動鞋NFT,呢啲運動鞋NFT除咗外形各有不同外,仲可以喺玩家每日步行嘅時候,行一步當兩三步咁計!
港NFT遊戲接受程度全球排第二

賺GST嘅方法有兩個,一係透過買賣運動鞋NFT,運動鞋嘅稀有度愈高,自然愈搶手;另一個就係行多幾步,揀啱對靚鞋就可以提升步速,賺取更多GST。呢個遊戲概念將Web3結合到我哋日常生活,相當之貼地,亦好易令人明白。難怪呢個遊戲推出短短時間,喺日本App Store嘅下載量超越咗Nike Training Club,絕對係一鳴驚人!最近佢哋亦公佈咗第二季成績,利潤達1.2億美元,證明喺全球已經有唔少擁躉。

暫時唔知STEPN喺香港多唔多人玩,不過早前有一份澳洲市場調查公司嘅報告指出,香港遊戲迷對NFT遊戲嘅接受程度相當高,喺全球26個調查嘅城市當中排名第二,有接近三成嘅受訪者表示玩過「play-to-earn」嘅遊戲,由此可見呢種新遊戲喺香港相當有發展潛力。

我哋公司一班新生代同事,啱啱推出咗「play-to-earn」概念嘅玩意NFTogether,客戶透過每日完成不同任務,就會獲得TCC遊戲積分。儲夠指定數量嘅TCC遊戲積分,除咗有機會獲得禮品之外,喺遊戲排行榜上最高分嘅頭20名,仲可以一齊贏走虛擬貨幣消費額,喺我哋嘅網店開心消費,大家不妨去試吓。
和記電訊香港行政總裁
古星輝

hd