任睇No.1
  • 28º
  • 70%
  • 2022年9月24日 星期六

古星輝 - 智慧城市新指標|乜都5G

香港通訊事務管理局(OFCA)不時會喺網站公佈同更新本地通訊業嘅統計數字,其中「香港電訊指標」、「流動電話服務」同「互聯網及公共Wi-Fi服務」等有關數字,對於想了解業界最新情況嘅人有好大幫助。

其中,傳媒經常引用嘅數字,例如按人口計算嘅流動服務用戶滲透率,截至今年3月嘅最新數字達291%,即係話每個用戶大約有三張SIM卡,足以令香港嘅流動服務滲透率成為全球最高嘅地區之一。

筆者早前宣佈開通700 MHz 5G頻段嘅基站時,就同同事提起「5G家居寬頻滲透率」呢個新名詞,方便我哋掌握5G家居寬頻嘅普及速度。

「5G家居寬頻滲透率」即係咩呢?呢個數字其實好有新鮮感同前瞻性,因為時代進步,上網已經唔再局限喺光纖到戶,目前最潮最chill嘅上網方式係5G寬頻。我將「5G家居寬頻滲透率」定義為:全港5G家居寬頻住戶數目 ÷ 全港總家居住戶數目。5G家居寬頻係一個5G應用方案,佢嘅滲透率對智慧城市發展嘅進程有一定參考價值。
5G家居寬頻潛力龐大

疫情反覆,家庭成員無論在家工作或學習,對寬頻嘅需求都有所增加。o依家5G寬頻逐漸普及,月費已經包埋5G路由器,即插即用;唔使安裝、唔使拉線,搬遷嘅話,打個電話就得,而且業界各出奇謀,吸引客戶試用5G寬頻上網。現時最吸引嘅月費低至88元,固網寬頻真係招架唔住!5G覆蓋嘅地方廣闊,對於傳統低密度住宅區、偏遠地區同村屋嘅住戶,以至居無定所、經常搬遷嘅人士嚟講,真係上網嘅突破!

眾所周知,5G嘅頻寬夠闊,喺英美早已廣泛應用於家居寬頻,填補偏遠地區未有光纖到戶嘅缺口。香港目前有超過264萬住戶,5G家居寬頻無論係作輔助用途,或者係未來取代固網寬頻,巿場潛力一樣龐大。

當更先進嘅5G路由器上巿同普及後,5G寬頻上網嘅速度更能達至數以GB計,加上88元呢個月費衝破晒心理關口,一個家庭裝返兩三個5G家居寬頻都絕不出奇,相信假以時日,「5G家居寬頻滲透率」會衝破100%!希望唔使好耐,我哋喺OFCA嘅網站,就可以搵到呢個咁有代表性嘅數字。
和記電訊香港行政總裁
古星輝

hd