任睇No.1
  • 28º
  • 83%
  • 2022年10月2日 星期日

古星輝 - 低密度住宅煩惱|乜都5G

近年搬屋,好多人都會將寬頻服務列入考慮因素,原因好簡單,現時娛樂、工作、學習都需要連線上網,所以寬頻訊號唔止收到,仲要收得好。

早幾日見到Banker C,原來佢最近搬咗去低密度住宅,諗住幽靜啲、空氣好啲,點知佢話激到成肚氣:「一心諗住搬去低密度住宅,環境闊落啲,空氣又清新啲,點知嗰度個寬頻速度極慢、價錢超貴,淨係為咗上網都已經搞到一頭煙!有乜理由得嗰幾M龜速,都仲要收我幾百蚊一個月,仲要係獨家村,想揀另一個供應商都冇,簡直撳住嚟搶,我全家暫時都係靠手機上網頂住先!」
靠5G寬頻神器打救

自從上月底700MHz 5G頻譜正式啟動後,呢個問題已經再唔係問題。700MHz呢段低頻帶嘅頻段穿透力特強,可以打造更深度嘅覆蓋,講得誇張啲喺山旯旮都收得到,相信呢段低頻帶會係低密度住宅嘅寬頻救星。最近市場出咗部最新嘅5G寬頻神器,可以話係為700MHz靚頻度身訂造;由於佢特設智能雙頻技術,可以將頻譜效益發揮到最高,喺啲特定場景之下,呢部神器竟然可以發揮到兩倍速度,比幾M寬頻快多多聲!成家人打機、煲劇、上網課或者在家工作都不成問題,而呢啲特定場景通常就係啲低密度住宅。

有啲用家揀屋企每件擺設都有啲要求,外形不能太掗拃、色調不能太老套。我見過呢部5G寬頻神器嘅實物,佢流線型設計嘅機身,全身白雪雪,好易配襯不同擺設,放喺屋企邊度都無違和感,相信呢部5G寬頻神器,好快會成為住喺低密度住戶嘅恩物。

當日同Banker C講完以上說話之後,噚日就收到佢電話,話5G寬頻神器真係解決晒佢嘅問題。所以話,5G的確同我哋生活息息相關。
和記電訊香港行政總裁
古星輝


hd