任睇No.1
  • 30º
  • 70%
  • 2022年10月5日 星期三

古星輝 - 去元宇宙Shopping|乜都5G

根據彭博行業研究估計,元宇宙市場規模會由2020年嘅5000億美元,增長到2024年嘅8000億美元,一個相當驚人嘅數字。所以,即使冇乜留意科技新聞,大家總會聽過唔少大品牌都話進軍元宇宙,開設虛擬店搶飲頭啖湯。大家又有冇試過上元宇宙shopping?

近年元宇宙的確備受各界矚目,唔少國際品牌搶灘登陸開設虛擬店,當中包括著名時裝品牌,佢哋睇準NFT獨一無二嘅特色,喺元宇宙舉行一個NFT服裝拍賣活動,結果竟然以565萬美元高價賣出;在零售商以外,亦有快餐品牌對元宇宙蠢蠢欲動,已經為其虛擬食物及飲品註冊商標,而客戶亦可透過虛擬商店購買食物,然後實體食物直送到府上;比較意想不到嘅係,亦有寵物店表示有意加入元宇宙,第一步推出限量寵物肖像NFT,將收到嘅款項扣除成本捐去動物慈善組織。
商家擴充銷售渠道

到底虛擬店同我哋平日去開嘅實體店可唔可以共存呢?現時只係元宇宙嘅起步階段,所以一切都係言之尚早。相信各大品牌希望借助呢個平台嚟提升知名度,接觸新一代嘅客戶,擴大客戶層面。其實商家可以視元宇宙為提供一個發展O+O(線上及線下)購物嘅理想平台,將銷售渠道擴充,日後更可以結合大數據及人工智能等技術,為客戶度身設計購物體驗。

現時有關元宇宙平台嘅名字,例如Sandbox、Voxels、Decentraland同Meta等近50個之多,而呢啲平台暫時未能互通,即係話我喺A元宇宙買咗件NFT靚衫,代表我着住呢件衫嘅虛擬人偶係去唔到同B元宇宙嘅朋友打招呼,變咗各有各玩,呢個好可能會係未來元宇宙發展嘅樽頸。

上期提過,我哋公司已經登陸元宇宙,喺Voxels開設首家虛擬門市,各位記得上嚟睇睇,畀啲意見。
和記電訊香港行政總裁
古星輝

hd