任睇No.1
  • 29º
  • 81%
  • 2022年10月3日 星期一

古星輝 - 5G旗艦手機摺力賽|乜都5G

每年8至9月都係旗艦機嘅季節,大戰前夕,不如講講智能手機最新走勢。根據市場調查機構IDC最近嘅一份報告顯示,2022年第2季全球智能手機出貨量較去年同期下降8.7%。話雖如此,手機商未有放軟手腳,落力催谷旗艦級智能手機。

提到旗艦機,除了鬥外型、鬥晶片、鬥跑分之外,熒幕絕對係另一戰場。5G年代網速快,可以傳送更多更高質素嘅內容,直接提升用戶對熒幕嘅要求,傳統智能手機直板設計,熒幕大小總會有限制。

直至摺芒手機嘅出現,正正兼顧用戶熒幕要大,機身不能大嘅要求,無論睇片、瀏覽網頁、電子書或處理文書工作都極為方便,唔使將畫面放大縮細、拉嚟拉去,亦為內容供應商提供更大發展空間。配合摺芒技術逐漸成熟,摺芒手機喺5G年代嘅智能手機市場異軍突起。
今年全球出貨量料升73%

的而且確,摺芒手機嘅市佔率一直上升。根據市場調查公司Counterpoint Research嘅資料,預期摺芒手機今年嘅全球出貨量會係1600萬部,較去年嘅900萬部爆升73%,呢個機構更估計明年嘅全球出貨量可以去到2600萬部。

另一間市場調查機構Canalys亦有相似睇法,估計2024年摺芒機全球出貨量直衝3000萬部,勢成各大品牌智能手機必備嘅主流設計。

近年可摺式熒幕嘅供應鏈增長迅速,令手機商選料有更多選擇,可望降低成本之外,未來更會出現更纖薄、更輕身,以及更高解像度嘅摺芒機,而數量會比現時更多。至於「果」一個品牌,一直都有傳聞佢未來都會加入摺phone行列,大家不妨拭目以待。
和記電訊香港行政總裁
古星輝

hd