古星輝 - 如何突破網絡樽頸|乜都5G

5G服務標榜速度高、時延低、萬物互聯。的確,踏入5G年代,大家嘅數據用量不斷增加,仲未計數量與日俱增嘅智慧城市應用,各位有冇擔心過日後會太多人用而令服務質素去到樽頸呢?
2025年大規模興建小基站

有調查估計,去到2026年,全球嘅5G數據用量會去到1,676EB(1EB等如10億GB),年均複合增長率達到63%。要應付不斷上升嘅5G用量,除咗不斷增加頻譜數量之外,增建基站去分流亦係提升網絡表現嘅一個方法,心水清嘅讀者可能會問,平時見嗰啲基站高過個人,唔係每個地方都咁容易加站。其實有一個叫小基站(small cell)嘅東西,佢體積細,用電量又低,好容易加裝喺室內同室外,有助解決網絡擠塞問題,對提升網絡表現極有幫助,所以要應付不斷上升嘅用量,密集式興建5G小基站係一個最有成本效益嘅方案。

呢個調查亦預期,2025年會踏入5G小基站大規模興建階段,到咗2027年,全球將會有超過1300萬個5G小基站。

到底小基站適合應用喺邊啲場景呢?相信大家喺一啲人多嘅場合,例如睇大型表演及運動比賽時,都可能會出現網絡擠塞嘅情況,若喺呢啲場地加設小基站,除咗可以提升網絡覆蓋之餘,仲可以同時解決網絡樽頸嘅問題。

我哋可睇睇另一個場景,隨著全球走向智慧城市,例如一般智慧應用以至車聯網等,需要連接至網絡嘅裝置大大增加,網絡覆蓋自然更加重要,例如喺電燈柱、交通燈等加建5G小基站,有效提升整個城市嘅網絡覆蓋。有啲私人機構亦可以透過5G小基站建構私人網絡,為佢哋物聯網同工業4.0嘅應用提供地氈式覆蓋。

雖然5G小基站勢將起飛,不過喺設計同性能上將會面臨技術挑戰。首先,5G小基站要更細更輕,同時支援更大頻寬以滿足需要。我相信,將傳統基站結合小型基站,可以發揮5G最大威力。
和記電訊香港行政總裁
古星輝

hd