古星輝 - 0+3=5G漫遊?|乜都5G

近期最令人振奮嘅消息,一定係「0+3」隔離政策出台,間接令外遊鬆綁,趁年尾之前可以去日本、韓國、泰國等鬆一鬆,機場勢將再度熱鬧起來。

回帶至疫情之前,自由行的普及,加上各種通訊及社交應用發展成熟,大家事無大小都鍾意開吓Live打個卡,或者打吓WhatsApp call;加上電訊商推出收費簡單嘅日費式漫遊服務,令數據漫遊漸漸成為外遊必需品。疫情下近三年來商旅數目大減,無得出門,無人講漫遊,更加無咩人特別講5G漫遊。

香港嘅5G服務推出兩年半,隨住其他地區陸續開通5G網絡,推出5G漫遊都係好自然嘅事。雖然商旅數目減少,但電訊商並冇停下來,好似我哋公司目前做到5G漫遊嘅國家及地區已超過20個,並且覆蓋30多個網絡。我哋仲啱啱同日本樂天通訊(Rakuten Mobile)達成協議,即係話用咗佢哋5G漫遊服務嘅客戶,嚟到香港漫遊嘅時候,就可以用到我哋最強嘅5G網絡。

講到呢度,到底5G漫遊有乜用呢?最大分別當然係速度方面,人在海外開Live畫面都清啲、睇片煲劇都暢順啲,甚至喺Netflix同Disney+都可以睇返香港版嘅內容,唔怕被切換至海外版。
環球5G客急升

隨著疫情放緩,網絡商對發展同推進5G漫遊,亦要開始做好準備。研究報告指出,環球5G客戶嘅數量會由舊年嘅450萬名,上升至2026年嘅2.1億名,增幅高達4500%!報告亦指出,環球5G用戶嘅漫遊數據用量會由舊年嘅2.6PB,上升至2026年嘅770PB。PB即係咩?儲存1PB的資料相等於要用超過150萬隻光碟。等大家容易啲明白,770PB即係相等於用Netflix串流4K影片1.15億小時。

當生活漸回正軌,國際旅客回流,我哋又開始出國外遊,加上愈來愈多人升級5G計劃,相信5G漫遊嘅需求將會倍升。

我哋已經為龐大嘅5G漫遊需求做好準備,你又升級咗5G未?
和記電訊香港行政總裁
古星輝

hd