古星輝 - 識得郁嘅天線?|乜都5G

講到流動網絡覆蓋,香港係世界上數一數二,由室外以至室內甚至港鐵及電梯都收到訊號,真係唔係好多地區做得到!更厲害嘅係,公司喺5G推出短短半年已經達到99%覆蓋,效率相當驚人,呢個記錄絕對值得自豪。
自動調整天線方向及強度

工程團隊喺達成呢啲成績嘅背後,要克服無限嘅困難,並非盲目興建基站就能夠解決問題,每個基站嘅擺放位置及方向都經過精心部署,單係物色地點已經十分艱難,仲要顧及成本效益同埋訊號干擾等因素。對於一啲有人潮聚集嘅場合,例如某啲喺返工放工時間人流特別多嘅地點及表演場館外圍等,要一下子滿足大量用戶喺同一段時間對流動通訊服務嘅需求,對電訊商嚟講係極大嘅挑戰。

最近內地有電訊商就開發咗一種新技術,可以幫助應付呢類情況。呢個叫「潮汐智能天線權值自優化技術」,其實屬於一種智能天線技術,簡單嚟講,係識得自動調整網絡天線方向及訊號強度,等5G訊號能夠按照當時用戶移動嘅情況而改變。
適用於具人流規律場合

以用戶數量有明顯流向嘅大學校園為例,由於學生每日喺特定嘅時間內,會有規律咁流向唔同場地,例如朝早會由Canteen去講堂或圖書館,落堂就返宿舍,喺呢種情況下,智能天線就可以依照呢種人流規律而自動調整方向及訊號強度,靈活照顧唔同用戶需要,而又唔需要不斷加建基站,令網絡資源更有效運用。
  正如剛才所講,喺某啲指定時段人流特別多嘅場所,未必適宜加建接收設備,智能天線應該可以大派用場,相信等稍後技術發展更成熟,電訊商可以更有效提升唔同地方嘅覆蓋,大家上網就上得更順更開心!
和記電訊香港行政總裁
古星輝
更多文章