任睇No.1
  • 18º
  • 82%
  • 2023年2月4日 星期六

古星輝 - 綠色科技.環保5G|乜都5G

5G自2020年4月推出後,電訊商努力鋪建基站,以提供最全面覆蓋。隨住基站數目增加,流動網絡基站須依賴持續嘅電力供應以維持服務;用電量難免上升,所以我哋好重視節能。我哋嘅工程團隊研究咗好多方案,確保喺拓展5G覆蓋之餘,能保護環境,達至可持續發展嘅目的。今日同大家分享我哋用咗一個新方法處理由基站產生嘅化學廢料。

一般用戶未必知道,其實位處策略性位置嘅基站同交換中心,例如喺主要高速公路、大型屋邨、工商廈等,電訊商都會為基站配備後備電池,以防電力供應不穩或天氣惡劣,特別係行雷嘅時候,好容易跳電,有咗後備電池,就可以確保網絡運作流暢。
後備電池壽命約5年

後備電池名為「鉛酸電池」,非常重磅,一般用5年左右就要更換。呢啲無用嘅鉛酸電池,屬於化學廢料嘅一種,以前要由供應商運到外國處理;直至近年,我哋成為香港電池回收中心嘅綠色夥伴,開始將廢電池交俾佢哋位於屯門環保園嘅中心處理。

呢間本地回收中心係第一間獲得政府許可嘅廢鉛酸電池回收再用工廠,佢哋會轉廢為材,從廢電池當中提取鉛,而鉛本身係重金屬,係有用嘅原材料。以清潔安全嘅方法處理廢電池,可以減少污染水土嘅機會,而唔使再將廢料送去外國,減少運輸,亦有助減低碳足跡及應對氣候變化。我哋喺今年7至8月期間,收集到約6.5公噸廢鉛酸電池,預期年底回收量將超過10公噸。

公司除咗一直積極採納唔同嘅環保方案,亦致力提高大眾嘅環保意識。我哋早於2012年推出嘅手機及配件回收計劃,今年已踏入10周年!喺全線舖頭收集到嘅舊手機、配件、電池、充電器、耳筒、耳機、USB線等,會轉交業界嘅「電腦及通訊產品回收」計劃處理。正常運作嘅配件翻新後就捐畀有需要人士,而零件同有用嘅物料就回收再用,長遠為保護地球盡一分力。
和記電訊香港行政總裁
古星輝

hd