古星輝 - 新NOC．新紀元｜乜都5G

乜都5G

古星輝

2022-10-28 00:00

產經專欄

內容

上星期公司最新一代嘅NOC正式啟用，我哋上下濟濟一堂，見證網絡營運發展邁向新紀元！

「NOC」係電訊網絡術語，有人讀N．O．C，亦有人簡單讀「Knock」。NOC嘅全稱為Network Operations Centre，即係網絡營運中心，係流動網絡嘅核心地帶，7×24全天候運作，守護數以百萬計用戶嘅流動通訊服務。真係要好多謝一班喺背後默默付出嘅同事！
NOC數碼化提升運作效率

新一代嘅NOC配備人工智能（AI）及大數據系統，以自動化和數碼化等先進技術提升運作效率，向網絡營運數碼轉型邁進一大步。

NOC作為營運平台，負責監測網絡運作，透過偵測網絡、基站、機樓等重要地方嘅傳輸流量同表現，確保網絡運作暢順。系統喺偵測到問題時，會自動發出警告，再由工程人員處理或外派出勤調查。

有AI加持同大數據幫忙分析之後，系統能有效將警告嘅數目大幅壓減（alarm compression），又識得透過應用程式自動派單畀同事，令我哋能精準調派人手，迅速處理同解決網絡問題，將對用戶嘅影響減到最低。道理就好似減少火警誤鳴，等消防員可以專心救人救火一樣。先進嘅NOC系統，仲可以實時知道受影響基站嘅數目、現場實況，以及進一步分析後續需要跟進嘅項目。

NOC仲有一個服務質素系統，可以監測漫遊數據流量及網絡表現，資料不停更新。好似近排日本開關，再加上0+3政策出台，而另一方面又有唔少人移民英國，喺NOC就見到漫遊數據流量排行榜，日本同英國穩佔頭十大。各種資料有助確保用緊我哋漫遊SIM卡用戶喺當地嘅上網體驗。

NOC不斷演化，新一代嘅NOC採納數碼維護（digital maintenance）同數據統一平台（unified platform），結合自動化同數碼化，大大提升營運效率。NOC所記錄嘅一啲大數據，例如客戶使用模式，更可以幫助業務營運嘅同事，主動出擊，推出更切合唔同用戶所需嘅個人化通訊服務，令網絡服務與商業營運及客戶服務更環環相扣。

當大家可能仲猶豫緊幾時升級5G計劃嘅時候，其實我哋已經開始未雨綢繆，為未來5至10年將會出現嘅5.5G同6G做好準備！
和記電訊香港行政總裁
古星輝