古星輝 - 人人戴眼罩的世代|乜都5G

要數到5G其中嘅殺手級應用,必然會想起虛擬實境(VR)同擴增實境(AR)。不過,5G推出了差不多兩年半,有人話呢兩大應用一直只聞樓梯響,而隨著Web 3.0與元宇宙相關嘅話題受到注目,AR/VR再度受到市場關注。
  根據市場研究公司TrendForce早前預期,喺2023年將會有更多服務帶動市場對AR / VR硬件嘅需求。另一間市場研究公司Report Ocean更表示,隨著亞太區5G網絡同VR使用率發展迅速,預計由2020至2030年將會有43.1%嘅市場增長,市場總值達1108億美元!

聽過有用家表示,VR眼罩普遍體積較大,變相局限咗活動範圍。今年有唔少廠商推出新一代嘅VR眼罩,包括Meta自家嘅Quest Pro、TikTok旗下Pico推出嘅Pico 4,以及HTC Vive Flow等。市傳Sony遊戲機明年將會推出新一代嘅VR裝置,仲有傳聞押後至明年推出水果牌嘅AR/VR產品,相信明年嘅AR/VR市場將會十分熱鬧。
AR/VR市場將十分熱鬧

隨著裝置選擇增加,更多內容供應商會加入製作相關內容及應用。近期台灣亦已分別將5G結合VR直播金鐘獎頒獎禮,以及喺博物館用上5G同VR讓參觀人士穿越2000年時空,化身考古學家到遺址考古,對認識歷史相當有幫助。

我哋喺去年都曾為香港中樂團將AR技術放入佢哋嘅新樂季小冊子,將3D樂器結合美妙樂聲,讓樂迷可以「聽圖賞樂」。其實AR/VR喺教育方面具有相當大潛力,可有效提升學生嘅學習興趣,詳情係點,稍後再同各位分享。

我哋即將邁向AR/VR年代,話唔定幾年後隨街見到戴上眼罩嘅人。
和記電訊香港行政總裁
古星輝
更多文章