古星輝 - 妙用5G建智慧校園|乜都5G

上星期講到5G可以為學校提供穩定可靠嘅流動寬頻,以支援校園內愈來愈多嘅流動裝置同新穎嘅教育科技方案。今日我哋睇吓喺學校點樣妙用5G。

朝早返到學校,門口如果設有一站式人工智能辨識系統,就可以立即辨識到同學嘅身份,量埋體溫,老師就唔使花時間點名。到咗上堂或小息,係5G機械人出場嘅時候喇!佢哋可以同學生傾偈、幫手播片教學,仲識幫手消毒同接待,係老師同工友嘅好幫手。

至於AR擴增實景應用,就方便老師以智能裝置自製語音、影片及多媒體AR教材,等學生開心學習。同學只要透過電子裝置,就可以睇到有聲有畫嘅補充資料。例如生物科講到恐龍,同學掃描教材,就可以見到唔同種類嘅恐龍,仲聽到佢哋嘅叫聲,咁樣上堂實冇人瞌眼瞓!

有AR又點少得VR虛擬實境教學!帶住VR眼鏡,學生就可以體驗到有趣嘅「沉浸式」學習;足不出戶,喺虛擬世界遊覽各地嘅名勝古蹟學歷史,或者置身唔同嘅生活場景,練習英文會話。
度身設計方案 助提升教學效能

喺商界,成日都話今時今日要數碼轉型,其實教育界都一樣。好似學校要舉行陸運會,事前要安排物資,事後又要盤點。結合5G同無線射頻辨識技術(RFID)嘅固定資產管理系統,老師就可以輕輕鬆鬆喺學校、運動場,甚至其他場地,用掃描器點齊物資,無論係體育器材、教材、書本、電腦,甚至幼兒院內嘅玩具都得,可以慳9成盤點嘅時間及人手。

呢個系統如果應用係圖書館,工作人員可以一次過掃描幾本貼咗晶片嘅書,將記錄入埋電腦,節省同學排隊借書嘅時間。系統仲可以利用分書帶將圖書分門別類,又識自動發送電郵,提醒同學還書,真係好方便。

其實呢啲都只係智慧校園內嘅部份例子,學校可因應各自嘅需要,度身設計「學校化」嘅方案,提升教學效能。政府有為學校提供資助,其中「奇趣IT識多啲計劃」及「中學IT創新實驗室計劃」去到2024年暑假完先截止,有興趣嘅學校可以計劃吓。
和記電訊香港行政總裁
古星輝
更多文章