古星輝 - 5G打造多姿多采校園生活|乜都5G

上兩期提及唔少智慧校園應用,唔少讀者都覺得好有趣,有校長朋友想我講多啲有關教育嘅方案,今日再同各位分享多兩個喺5G推出之前好難實現嘅應用場景。
人工智能互動運動系統
  o依家學校注重學童各方面嘅均衡發展,體育更係其中一個重點項目。Sports Day大家都聽過,唔知大家有冇參與過eSports Day?由於5G超高速、低時延,透過先進嘅「人工智能互動運動系統」,可以將體育科技應用喺校園。呢個系統利用全息投影及互動感知等技術,可以為學生提供唔同嘅運動體驗,例如模擬滑雪、踩單車、劍擊等,唔使喺真實場景都做得到;加上動態偵測裝置,更加可以幫手分析參與者嘅運動姿勢,以及用人工智能測量及分析表現,非常實用。沙田嘅一間中小學,就用咗呢個方案嚟舉辦eSports Day,日後甚至可以同其他學校舉辦聯校比賽。

長沙灣就有一間中學同樣用緊「人工智能互動運動系統」,由於學校環境設計比較特別,學生練跑嘅時候,經常會喺轉角位跌親,於是學校特別加入AI分析系統,當預測到可能有同學跌倒嘅時候,即時發出警報通知老師,等校方可以及時處理。
巴士車廂體驗生命教育

之前提過,虛擬實境(VR)同擴增實境(AR)嘅普及,喺教育界有極大發展潛力。喺馬鞍山嘅一間中學,早前獲得巴士公司捐贈一輛退役巴士,學校將佢改裝後命名為「有價巴士」生命體驗館,裏面以VR/AR技術讓該校學生以嶄新方式體驗生命教育。

用得VR/AR就一定要連線上網,喺巴士車廂入面,5G寬頻發揮強大作用,唔使拉線已經可以為車廂提供高速連線,將人生嘅唔同場景傳送到VR裝置,等學生喺沉浸式嘅環境下,發掘生命價值,培養正向人生價值觀。

一連三個星期同大家分享咗唔少智慧校園嘅實際應用,其實5G校園應用尚有龐大發展空間,教育界嘅朋友不妨研究一下。
和記電訊香港行政總裁
古星輝

hd