任睇No.1
  • 19º
  • 85%
  • 2023年2月2日 星期四

古星輝 - 5G揉合元宇宙開創商機|乜都5G

近期喜見香港逐步復常,除咗上月舉行嘅《國際金融領袖投資峰會》,上星期又有《香港經濟峰會2023》,邀請咗好多政商界翹楚,就「穩經濟.尋新路.創機遇」嘅主題分享及討論。筆者好榮幸參與其中,並藉此機會剖析5G如何結合元宇宙,為各行各並業開創新經濟機遇。

元宇宙嘅概念近年席捲全球,為我哋嘅生活帶來前所未有嘅改變。好多行業紛紛投入元宇宙,例如虛擬演唱會、虛擬藝術、虛擬土地買賣、虛擬商店、虛擬社區等應運而生,喺衣食住行及娛樂方面為大眾帶嚟虛實並重嘅嶄新體驗。作為前瞻嘅數碼營辦商,我哋睇到元宇宙龐大嘅發展潛力,並喺多方面開拓相關業務,包括帶動更多元宇宙嘅創新應用,打造全新嘅數碼世界。我哋嘅門市就以「雙線發展」,除遍佈全港嘅線下門市,亦率先喺區塊鏈平台Voxels開設線上旗艦3Shop,將業務拓展至元宇宙,等用戶化身成avatars虛擬人物,喺沉浸式嘅虛擬世界體驗及購物。
為企業「賦能」促進元宇宙發展

我哋亦同好多技術供應商及多媒體夥伴合作,結合5G網絡嘅優勢同其他先進技術,為企業客戶度身設計解決方案,等佢哋可以輕鬆喺元宇宙舉辦多元化嘅虛擬活動,開拓潛在商機。由我哋擔任中立嘅技術及商務綜合解決方案提供者,無論喺商業對商業(B2B)或商業對客戶(B2C)嘅層面,都能為企業「賦能」,促進元宇宙發展。

雖然目前元宇宙仍處於發展階段,但研究預期2026年,全球25%人口每日會用最少一小時喺元宇宙上,而全球有30%機構會推出與元宇宙相關嘅產品及服務。受疫情影響及時勢所趨,好多企業都面對着數碼轉型嘅洪流。我相信元宇宙透過5G,配合適當嘅商業模式同發展方向,將為各行各業帶嚟好多新機遇。
和記電訊香港行政總裁
古星輝

hd