古星輝 - 5G寬頻特別行動組|乜都5G

上文提到5G喺打造「智慧鄉郊」發揮咗舉足輕重嘅角色。今期同大家分享電訊商喺偏遠地區拓展5G家居寬頻嘅實例。

話說巿區有「街霸」推寬頻上網,喺鄉郊,我哋公司就有「5G特別行動組」,由資深銷售同事組成,並由網絡工程人員同客戶服務部同事做支援,專攻鄉鎮5G寬頻業務。

特別行動組喺香港嘅鄉郊社區深耕細作,佢哋由開始認識村民,慢慢了解佢哋嘅需要,到實地勘察如何全面改善村落嘅網絡基建同訊號覆蓋,事事親力親為。
助鄉郊村民脫離龜速上網

成員個個都善於溝通,又有耐性,好有心機為村民設計屋企嘅5G佈局同智慧家居。我哋嘅特別行動組喺某條村嘅悉心服務,慢慢一傳十,十傳百,半年後全鄉鎮幾百戶,差不多一半都轉咗用5G寬頻,脫離龜速上網。同事話,最有成功感係可以幫到村民(特別係老友記)用到緊急服務,例如遙距視診,仲可以同移咗民嘅「soon」仔傾吓偈。

我哋全力推動5G家居寬頻,希望吸引更多家居客戶升級;一家幾口,試過5G嘅好處,自然會轉用新科技。有人話5G仲未普及,係因為未有殺手級應用出現。其實5G家居寬頻正正就係一個簡單易用嘅方案,可以成功解決偏遠地區上網又慢又貴又要拉線嘅問題,同光纖上網互補,令更多人可以高速上網,成就更多可能。

講開5G家居寬頻,一定要提吓個路由神器。呢種新款神器嘅接收訊號同發送Wi-Fi嘅威力,比手機強勁好多,仲支援雙頻700MHz及900MHz,可以充份發揮呢兩段頻譜穿透力強、覆蓋廣闊嘅優勢。

踏入2023年,5G喺香港已推出差不多3年。要真正普及5G,我哋仍須努力。一方面,吸引更多個人用戶升級至5G;另一方面,鼓勵城中各行各業廣泛採用5G應用方案,同時加強「智慧鄉郊」嘅發展,如此,香港距離成為國際智慧城市嘅日子還會遠嗎?
和記電訊香港行政總裁
古星輝
更多文章