古星輝 - 嚴選5G寬頻四大貼士|乜都5G

臨近歲晚,唔少朋友都遷新居迎新歲。講到新居入伙,今時今日寬頻地位同水、電、煤幾乎睇齊,缺一不可,新年快到,到底如何可以快靚正辦妥新居上網方案?

傳統固網寬頻由登記到師傅裝線,快極都要成個星期,新年流流大家未必成日喺屋企等師傅,插個掣就用得嘅5G寬頻係一個快靚正嘅選擇,登記完返屋企插5G Router即刻用到。市面幾大網絡商都有提供5G寬頻服務,對普羅市民嚟講未免花多眼亂,以下幾個格價重點,可能會幫到大家。
揀計劃留意四大細節

5G寬頻通常以月費低自居,目前市面入場月費由88元至168元不等,留意部份網絡商嘅計劃係包埋5G Router,有啲就需要客戶另外購買或者月租,普遍費用由千幾至二千幾元,計埋5G Router後嘅平均每月支出可以相差近100元,以24至30個月嘅合約期嚟講都幾襟計。

用量方面,家居寬頻用嚟煲劇、睇戲、打機、上網課、開會,甚至要做埋智能家居,當然要任用先啱數。原來其中一個網絡商喺每月用滿200GB後,只可以最高10Mbps嘅速度繼續使用,呢個速度下隨時寬頻大塞車,全家都要克制使用,未能盡興。

另外,可能大家都以為5G寬頻淨係得屋企用到,有網絡商特別喺計劃入面,畀客戶額外加多一個屋企以外嘅指定地點任用5G寬頻,令使用上可以更加靈活有彈性。

最後,喺網絡技術上都有少少考究,目前5G寬頻嘅用戶係以村屋、獨立屋、唐樓或者蝸居戶為主,通常位置偏遠,有網絡商以700MHz及900MHz雙低頻提供服務,訊號範圍特別廣闊,加上穿透力特強,即係住得偏僻或者距離發射站較遠都一樣覆蓋得到。

想揀個最抵用嘅5G寬頻,就要記住以上四大貼士。

今日大年廿九,謹此預祝各位讀者兔年身體健康、萬事如意,兔年再見。
和記電訊香港行政總裁
古星輝

hd