古星輝 - 2.23電話卡實名登記截止|乜都5G

兔年伊始,祝願大家動若脫兔!大吉大利!

農曆新年期間睇電視,見到好多提醒巿民有關電話卡(或稱太空卡)實名登記嘅宣傳片,提醒用戶於2月23日(2.23)前登記,否則蘇州過後無艇搭,之後用唔到本地通訊服務。

公司專責電話卡業務嘅同事話我知,我哋電話卡用戶實名登記嘅進度良好,好有信心大家能順利過渡2.23。

話說去年3月1日實施電話卡強制實名登記,當日及之後買嘅新卡,要強制實名登記,所以呢一批客戶嘅實名登記率係100%。至於喺舊年3月1日前買嘅電話卡,就要喺今年2月23日前實名登記,否則用唔到本地通訊服務。

買電話卡使用本地通訊服務嘅用戶,以學生、長者、家庭主婦或外傭為主。據同事所講,已有超過一半電話卡用戶做咗實名登記,進度符合預期。雖然如此,但距離登記限期不足3星期,同事一方面對電話卡用戶千叮萬囑,一方面亦千方百計鼓勵佢哋盡早登記,例如喺截止日期前登記,會免費送100 GB本地數據。
提示短訊加入連結方便登記

我哋密密提醒用戶,包括每月發出提示短訊,又喺客戶增值電話卡嘅時候,彈出提示;而踏入2月,更加會每兩星期提醒客戶一次;直至2.23,最後通牒。另外,我哋加設咗實名登記熱線,解答用戶問題。另外,喺高峰期,我哋亦特別喺元朗、深水埗及同灣仔3Shop門市,加設關愛櫃位,幫助老友記登記。

大家可能會問,過咗期無實名登記會點?最大嘅影響,係失聯,即係打唔到電話、上唔到網、收唔到短訊,例如銀行密碼或驗證碼等。不過,為咗方便客戶,我哋好貼心咁喺提示短訊內加入實名登記連結,萬一真係逾期未登記,只要張電話卡未過期及插入手機,客戶即時搵返條link,配合智能手機,就可以隨時登記返,恢復服務。

方便自己,方便親朋,呼籲大家,及早登記!
和記電訊香港行政總裁
古星輝
更多文章