任睇No.1
  • 32º
  • 63%
  • 2023年6月10日 星期六

古星輝 - AI降臨你Chat咗未?|乜都5G

人工智能(AI)同ChatGPT呢堆名詞,成為近日最熱門嘅流量密碼,翻查一下Google Trend,發現ChatGPT喺香港嘅人氣於2023年明顯上升,近兩星期更是急速爆上,大家都會留意無論網絡上或者身邊朋友,愈來愈多人講ChatGPT呢個AI聊天機械人應用,連微軟、Google同百度等科技巨擘都同AI聊天機械人扯上關係。

ChatGPT之前對我哋有啲離身,皆因香港用戶要經VPN及外國電話號碼方可登記。由著名問答網站開發嘅Poe app呢幾日開放註冊,香港嘅用戶終於可以試玩,而Poe入面內置咗3個AI聊天機械人,其中兩個都係用上同ChatGPT相同嘅AI技術,另一個就係用咗Google最近入股嘅Anthropic AI技術,留意3個機械人都只會知道2021年前嘅資料。
2035年全面發揮5G結合AI潛力

日前初步試用過Poe,發覺佢嘅寫作功能的確幾有趣,文筆亦算流暢,惟資料準確但未算太豐富,畢竟寫作需要經過多重思考及資料整理,而AI聊天機械人只是起步階段,需透過大數據收集及學習才會慢慢成熟,大家唔能夠過份倚賴。

平日出席活動經常以ABCDE去介紹5G,當中嘅A正正就是AI。5G喺AI嘅發展擔當重要角色,市場研究機構ABI估計,5G結合AI嘅潛力將於2035年全面發揮,預期屆時全球相關行業生產率提高5.8%(約11.4萬億美元),工業製造業、汽車運輸業以及零售批發行業,將會係受惠最大嘅三個主要市場,其餘好似醫療保健、媒體娛樂、農業、政府事務、金融服務及建築能源行業生產率都會有所提升。

ChatGPT同Poe嘅出現,令各位注意到AI慢慢開始融入我哋生活,未來十幾年可能會協助我哋處理大小工作,有網民認為呢類AI聊天機械人,可以喺客戶服務及編程方面大派用場,不如大家周末又試吓Poe,睇睇有冇新發現。
和記電訊香港行政總裁
古星輝

hd