任睇No.1
  • 32º
  • 62%
  • 2023年6月10日 星期六

古星輝 - 頻譜費可扣稅創三贏|乜都5G

上星期出爐嘅《財政預算案》,建議讓電訊商就將來投得嘅無線電頻譜所俾嘅使用費可以扣稅。

業界好高興當局有聆聽我哋嘅聲音,相信有關措施,對電訊業、流動通訊客戶,以至香港嘅未來發展會帶嚟「三贏」嘅局面。

頻譜係珍貴嘅社會資源。做流動通訊生意,必須要有頻譜,就好似整麵包唔可以無麵粉一樣。頻譜對於普羅大眾,就好似水電咁重要。以前頻譜使用費分15年繳交,但係2007年後當局話要便利行政,要求我哋由分期畀錢改為一次過全數預先俾晒。我哋同意新嘅支付方式,反正錢都係要俾,不過最奇怪嘅係畀錢嘅方式改變咗,但頻譜使用費竟然由原本可以扣稅變為唔可以扣稅。呢種做法唔常見,參考其他地區,近至中國內地、日本、南韓,遠至英國、德國、澳洲都唔係咁。
扣稅鼓勵再投資

多咗呢筆龐大嘅額外稅款,令成本增加,壓力都咪話唔大。所以上星期頻譜使用費可以扣稅嘅消息一出,所有行家都好開心,因為慳返嘅資源,可以鼓勵業界再投資。

大家成日講香港「智慧城市藍圖2.0」,而「十四五」規劃又建議加快建設數碼經濟、數碼社會,以及支持香港發展為國際創新中心;凡此種種,都有賴世界級嘅5G網絡基建。能夠畀電訊商節省稅款,將資源用返喺業內,對於鞏固香港作為國際電訊樞紐,推動及落實智慧城市各項措施有好大幫助。

期望喺落實頻譜使用費扣稅嘅時候,可以不限於將來投得嘅無線電頻譜,等我哋可以善用資源,將香港嘅5G基建做得更有聲有色!
和記電訊香港行政總裁
古星輝

hd