古星輝 - 5G力撐「你好,香港」藝術月盛事|乜都5G

近期藝術盛事浪接浪,藝術月果然名不虛傳。當中全球矚目嘅年度國際藝術盛事「2023年巴塞爾藝術展香港展會」,日前已經喺香港會議展覽中心展開,今年係我哋連續第二年參與其中,更加成為大會官方合作夥伴,繼續為盛事出力。

今年我哋為來自全球32個國家及地區合共177間頂尖藝廊,喺展區提供專用5G流動寬頻服務,據負責設計佈陣嘅同事講,今年係自2019年以嚟最有規模嘅一屆,參展藝廊數目較去年多40多間,展區範圍更由去年嘅一層變為橫跨兩層,所以在5G流動寬頻佈陣上,要嚴謹兼周密。由於會展係由我哋擔任5G公共流動通訊系統牽頭營辦商,所以場內網絡容量同信號均相當理想,工程團隊只需研究5G路由器最佳嘅擺放位置,即可提供全面覆蓋。同事話,今次全場網絡經過精密部署,務求覆蓋滴水不漏,等海外參展藝廊試吓香港5G嘅威力。
5G流動寬頻實測表現理想

大家可能會問,明明係一個藝術展,點樣同5G拉上關係?疫情期間,好多事情都要靠網上處理,高速嘅5G為我哋帶來高清又方便嘅視像傳送能力,亦衍生出結合數碼及實體平台嘅展會。如今全面復常,場內嘅高速5G流動寬頻服務,可以讓參展商透過視像方式接觸未能出席嘅客戶,並展示會場展品;而藝廊亦可展示未有帶到會場嘅作品,令參展藝廊同客戶嘅溝通可以更靈活。

我日前亦都去咗會場參觀,感覺今年展區更大之外,現場人流亦是去年嘅倍數,人來人往,場面相當熱鬧。除咗欣賞唔同嘅展品外,我都實地測試現場嘅5G流動寬頻嘅實力,試到400Mbps嘅下載速度,可以話十分理想,傳統Wi-Fi都未必會有如此表現。我好有信心,香港好快會再次成為盛事之都,網絡商全力配合政府「你好,香港!」活動,透過最強5G網絡,協助帶動本港經濟復甦!
和記電訊香港行政總裁
古星輝
更多文章