古星輝 - 5G世代服務個人化|乜都5G

聽日係我哋推出5G服務3周年!多年來,我哋一直喺消費者市場及企業市場全力普及5G,並引進嶄新應用。由於不同客群對通訊服務嘅要求各異,作為新一代嘅數碼營辦商,我哋亦精準配合客戶需要,提供個人化或度身訂做嘅服務。

喺個人客戶方面,我哋專攻高端巿場嘅尊尚品牌近日剛剛出爐。唔少用戶談論手機熒幕上嘅訊號顯示,由原本嘅數字自動轉為新品牌名字。呢個「睇得到」嘅轉變,係我哋喺5G世代為客戶提供個人化服務嘅其中一環。

背後「睇唔到」嘅獨特意義,係透過提升網絡使用優次,畀新品牌客戶尊享更多網絡資源——特別係分秒必爭、時刻運籌帷幄,對通訊服務水平有極高要求嘅高消費客群,以配合新時代嘅數碼生活模式。

呢種網絡資源嘅「個人化」,喺網絡擠迫嘅情況下,功用尤其明顯。例如喺人多嘅港鐵、展覽場館,以至大型場地,當好多客戶一齊出現時,網絡就會按實際情況,自動作智能調整,客戶就好似駕車時用專用快線,獲享暢通無阻嘅網絡服務。

除網絡服務外,個人化客戶服務亦好重要。公司進行咗連串客戶調查,知道客戶好欣賞我哋專屬私人助理服務,佢哋好比私人銀行嘅客戶經理或私人秘書,毋須熱線接駁,隨時可以用WhatsApp聯絡到。
對吸納新客別具吸引力

隨着社會復常,好多客戶外出旅遊,萬一佢哋遺失電話或SIM卡,專屬私人助理將竭盡所能,提供適切嘅海外支援服務。由此可見,個人化客戶服務對吸納新客、留住舊客別具吸引力。

當然,個人化服務亦適用於企業巿場。喺5G世代,最能為企業度身而設嘅例子係以網絡切片技術打造5G私人網絡,為企業客戶獨家設計網絡部署及設備。好多領域或場景,例如貨櫃碼頭、機場、大型展覽中心、工廠、醫療及金融機構、大學校園等,均適合自設5G私人網絡,不但喺網絡保安方面係大躍進,亦有助革新營運模式,促進各行各業發展。
和記電訊香港行政總裁
古星輝
更多文章