古星輝 - 5G打造元宇宙英語教室|乜都5G

作為Web 3.0主打項目,元宇宙應用場景無限大。以往大家聚焦元宇宙在遊戲方面嘅發展,事實上一間中學已經將5G及元宇宙結合,剛剛推出了元宇宙英語教室,讓同學們於充滿新鮮感、有趣嘅場景下學習英語。

公司啱啱為新會商會陳白沙紀念中學實現一個結合5G及元宇宙嘅英語教室方案,鼓勵並培養同學於STEM及英語方面嘅興趣,為未來作好準備,而我哋亦協助學校成功申請政府「鼓勵及早使用5G技術資助計劃」嘅資助。

整個方案設計相當有心思,校方將一個現有課室改裝成元宇宙英語教室;配合VR眼鏡、5G寬頻以及度身設計學習內容,為同學們提供沉浸式學習體驗。呢個元宇宙教室共有10個場景,包括餐廳、主題樂園、動物園及電影院等。同學可以透過化身虛擬角色,喺不同場景下,恍如置身現場般與老師及其他同學進行特別設計嘅任務,以更活潑生動嘅方式學習英語,同時親身接觸Web 3.0世界,培養STEM方面嘅興趣,真係一舉多得。
電訊團隊跟進裝修工程細節

網絡商今次嘅角色,除咗設計方案及提供5G服務外,團隊竟然仲化身為室內設計師,為學校提供一站式服務。

根據負責團隊所講,整個項目最具挑戰性係改裝課室,雖然無需親自鋸木揼釘,但團隊要跟進各項工程細節,配合學習場景,並確保與校方要求一致,這正是網絡商跳出傳統電訊服務框框嘅一次經典示範。

另一方面,將課程搬入元宇宙亦需由團隊反覆測試,元宇宙英語教室才可順利誕生,為同學們提供極具新鮮感有趣嘅學習模式,大大提升對英語寫作及會話嘅興趣。

今次合作,正好為5G元宇宙應用喺教育方面踏出重要一步,我哋相信呢個場景仲有龐大潛力等待大家開發,為莘莘學子提供更有趣味、更有效嘅學習平台。
和記電訊香港行政總裁
古星輝
更多文章