查小欣 - 隱世小店「良順興」|查乜料

去大角咀「良順興」開餐,小店一眼望晒,八、九張四人枱。是夜有如中菜阿媽家姐(Omakase),由大廚兼老闆Ken哥和助手武哥發辦,椒鹽魷魚、泰式冰鎮鮑魚、油鹽焗重皮蟹、沙白蘿蔔豆腐湯、水煮安格斯牛肉、熱辣辣蟹膏蟹粥,其中三大至愛:十分邪惡的豬皮炒豬大腸,豬大腸肥美,洗得十分乾淨,微辣,熱辣辣夠鑊氣,好食到停唔到口;招牌菜鍾無艷肉餅——香煎厚肉餅上一半鋪鹹蛋王,另一半鋪炸香瑤柱再灑上白芝麻,入口肉香、蛋香、瑤柱香,層次分明;東星斑兩食,一食用蒜蓉麵豉蒸蒸,惹味,雖然飽到上喉嚨,也忍不住叫了碗白飯撈魚汁,二食椒鹽頭腩,骨脆肉嫩,佐酒名物。

全晚每桌都翻四、五輪枱,外賣一個接一個,甚受街坊歡迎,連小朋友也是熟客,街坊小菜或客飯,每款五、六十元,抵過自己買餸煮,人人食得津津有味。

忍唔住翌晚即興幫襯,沒預訂任何菜式,要了招牌雙酸鱸魚,雙重酸味辣而不嗆,魚肉不散,味道一流,另加肉碎菜脯煎蛋,金黃厚身如pizza,蛋香令人流曬口水。老闆Candy話想食甚麼,只需預先告知,他們便去街市買料,不一定是巴閉大菜,就是一條紅衫魚也可以,有朋友食上癮,為了那煎封紅衫魚頻來光顧。大廚Ken哥不但煮得一手好菜,人又高大又靚仔,來個造型大變身,隨時升呢做靚仔廚神。
查小欣

hd