任睇No.1
  • 28º
  • 83%
  • 2022年8月10日 星期三

曾智華 - 溫柔火爆兩譟伯|祿祿無窮

歎早餐,我朝朝選擇同一餐廳,坐同一位置,食同一個A選擇:奶茶、齋多士、雙太陽蛋及火腿仿鮑魚通粉。無可能食得晒,故把通粉用自備外賣盒包起成為午餐。

早餐,是我一天的最大享受,三大樂趣:一、歎食物;二、歎報紙(五份!);三、聽兩丁火爆阿伯情緒發洩!

你一定會問,聽人情緒發洩都係「享受」?變態乎?真係㗎!佢兩個七十幾歲,滿身是火,滿口粗言,全部搞笑,都在鬧老婆。講的,無非是日常雞毛蒜皮小事,但一駡就七情上面,粗口狂噴,似火山爆發。

呢呢,昨朝兩個又嚟料。

A伯:大佬呀,男人年紀大,當然機器壞,前列腺發大㗎啦。咁,小便咪玩滴滴仔囉。你估我想嘅咩。頂佢頭槌,日日夜夜俾隻老虎乸鬧,又話我屙唔正,又話我搞到地下濕晒。喂,我次次已經抹返乾淨,先出嚟㗎啦,但仍然唔滿意,話成陣尿味。唉⋯⋯昨早竟下死令,要我下周開始,要學佢坐低小便。喂,老B,我哋男人嚟㗎嘛,有尊嚴㗎嘛,點可以變女人咁,坐低小便咁冇男性氣概,如今日日搞到家嘈屋閉!

B伯:我隻老虎乸重惡!昨晚口渴,打開雪櫃,隨手攞罐嘢飲,哈,結果俾佢省到黐肺,話我偷嘢,真係又要頂佢個頭槌!喂喂喂,成頭家過去幾十年邊個養?雪櫃啲嘢,邊個出錢買?有乜我唔飲得?要申請問准乎?都黐線㗎⋯⋯

你咪睇兩個火噴噴阿伯咁勞嘈,以為同家中老虎乸日日紮馬。其實,我哋大家街坊,經常碰口碰面。兩位燥伯次次拖住老婆手仔行街,唔知幾恩愛。所以,諗返佢兩個早餐的反差對話,好鬼搞笑㗎!
曾智華

hd