曾智華 - 短裙黑絲佢贏晒|祿祿無窮

   近年報章娛樂版,經常突出女藝員幾時幾時着黑絲,恍似發現新大陸。
其實,女性穿絲襪凸顯性感,應該最少有七、八十年歷史,大家翻看瑪麗蓮夢露年代的明星照片已知。

有一段時期,魚網絲襪更大為流行。一九六五年小學時,正有一位Miss天天黑色魚網絲襪上課,搞到我哋成班發育少年,極難集中精神聽書。

短裙黑絲,其實並非個個穿都好看的。第一個香港女性穿得最出眾者,為七十年代初香港電台話劇組花旦葛劍青。一轉眼,佢剛過七十大壽,真要唱句—— Happy birthday to長腿嫲嫲也。

講穿衣大膽,其實,半世紀前的香港女性,已經通街露膊、露臍……尤喜穿着超級短裙。搞到我哋呢類血氣方剛男生,在坐面對面巴士或電車時,對眼唔知點望。

講講葛劍青,五呎九吋高,雙腿極修長,怎不日日show off?唔使講你都諗到,短裙美女再身為電台話劇組花旦身份,會令幾多各路男性神魂顛倒撼埋牆呢?排滿彌敦道呀!

究竟,Kimmy今日可還有超級磁力?絕對有!我點知?因剛上載佢幅最當打時靚相到fan page。不得了!昔日拜倒裙下的男粉絲洶湧出現,又珍藏電視片段,又各式活生生形容,擺明懷念之情歷久不衰,魅力沒法擋呀!
曾智華
更多文章