任睇No.1
  • 28º
  • 83%
  • 2022年8月10日 星期三

曾智華 - 「牛肉乾」早餐真好味|祿祿無窮

做得公僕(小弟做咗三十六年!),預咗俾市民窒(出氣),包括揶揄:「你班友薪高糧準,做又三十六,唔做又三十六,奉旨蛇王!」

係真唔係真?就小弟N年所見,有真有假。數十年前,真的多。早年香港,做官真係大晒,無王管咁款,只要上級下屬「圍威喂」互相包庇,咁就隨時可以半Team人開工,半Team人蛇咗上內地Happy。其時唔興互篤,傳媒勢力又冇乜,所以,好安全。

不過,自從廉記成立,傳媒爆炸性開放(八九十年代至千禧年),競爭空前激烈下,當然搵貪官蛇官祭旗,兼且,市民投訴風氣也開始大盛,做公務員行差踏錯,太大風險,甚少人敢博。

無他,冇人會攬你也。

當然,工作效率慢,仍不時有,但此非是罪,最多升慢啲啫。不過,真㗎,唔係個個公務員都想升職㗎。

今日我想講乜?乃想指出,今天有不少公務員,真係勤奮到你唔信,簡直要起立敬禮㗎!佢哋絕不會「做又三十六,唔做又三十六」。邊個?正是負責抄牌的警員及交通督導員。佢哋鋪積極性及高效率,相當驚人。

呢呢,小弟昨天就親身感受到嘞。早上七點,泊低車食個早餐。完全冇阻街。但⋯⋯犀利,政府加送「牛肉乾」,可能驚我我唔夠飽(圖),一睇,七點四十二分抄,咁勤力,服未?
曾智華

hd