曾智華 - 蘇大媽手包水餃|祿祿無窮

上日介紹一間在土瓜灣浙江街及馬頭圍道交界的懷舊糕點店,若你去幫襯,一定要行多兩步,直落馬頭圍道轉右272號,到「老上海」順便買幾盒白雲鳳爪、醉豬手及萵筍嘞。

最最重要,若有幸見到一位中年太太在密密手包水餃,就打個招呼,叫聲:「蘇太你好!」

蘇太及兒子是正宗上海人,老家仍在上海,移居到香港,做返最擅長的上海菜。不是大爐大鑊的炒賣,而是簡簡單單專賣各式冷盤、水餃雲吞及麵點。

此店只得三分一間鋪位面積,非常細,故不主攻堂食。你坐低食,也覺逼夾。

我呢,一於全部外賣。

小弟約兩年前發覺此店,也是基於為食鬼的好奇。某日經過門口,但見一位上海大媽在密密手包水餃雲吞(圖)。我見咁新鮮,推門入內與佢閒聊,睇睇有乜正斗出品。

大媽有着內地小區老街坊的樸實,知無不言,不誇張,只坦誠話你知邊樣好味。

第一次,我全部買買買,包括北京水餃、上海雲吞、醉豬手、白雲鳳爪,統統拿回家請菲傭姐姐炮製。

水餃雲吞入口,非常有專業水準,肯定可以長期幫襯。於是,翌日膽粗粗再拜訪,問大媽:「可否替我度身訂造口味?例如唔要白菜、西芹,改要西洋菜?又或加重冬菇絲?」

「得,冇問題!」一臉和詳回應。從此發達!凡想食乜味,直接請蘇大媽包可也。
曾智華
更多文章