任睇No.1
  • 27º
  • 93%
  • 2022年8月19日 星期五

曾智華 - 倒轉得唔得呀?|祿祿無窮

過去N年,不停在社交場合聽見不同父母,大大聲話自己開明唔專制唔獨裁。不過,講講吓,又個個要求仔女咁咁咁,由行為衣着選校選科全部干涉。最離譜,拍拖搵邊個又管,做邊行又管……喂,我心諗,夠未呀,你估你仔女係奴隸咩!若果我係佢,一早離家出走啦,因自由意志完全受操控。

其實,呢類父母,好簡單啫,若肯認真諗吓倒轉,若自己同樣受父母強硬扭曲意願會點?會家庭和諧?

事實,我親眼見不知幾多父母子女關係破裂,正因上一輩將自己個人希望,強加仔女身上,並且諸多恐嚇,若唔照做就「斷糧斷水」。

如此情況,子女可以點?一係仇視反叛,一係啞忍buy time陽奉陰違。總之,一個都冇甘心情願接受父母的硬屈。

小弟早早開竅,故由零開始尊重仔女意願,包括選校選科選對象。作為成年人,佢哋有權自由選擇,我只默默支持。選工作更如是,迫仔女做冇興趣又冇天份工作,係我都會反面!

今日有感而發,因見上周本報娛樂版訪問譚詠麟,佢竟聲大大話:「嚴禁兒子加入娛樂圈!」原因係——辛苦。

喂,大哥,你成世做娛樂圈就得,更揚言早上晒岸仍日日唱歌,正因好享受。哈!但一轉身就唔俾阿仔曝光(見圖),更唔俾佢自由選擇事業,係乜邏輯?個仔二十四歲,有腦㗎!
曾智華

hd