任睇No.1
  • 31º
  • 68%
  • 2022年8月15日 星期一

曾智華 - 一獨步香江小炒王|祿祿無窮

做人又好,做生意也好,絕不可只倚靠運氣,不可靠符碌,必須凝聚實力。因為,運氣及符碌,只可以是一次或短暫。跑大長途,你想偷雞?發夢冇咁早!

所以,任何食肆成功,必定有其超越同業之道,凡晚晚爆的食肆,你去幫襯,一定唔會錯。因其他食客已替你做咗可靠的「市場調查」。另有個簡單邏輯,若晚晚貨如輪轉,如此,一切食材用料,當然新鮮!

旺角柏樹街,正正有間這類食肆的樣辦,晚晚爆到瀉,生客熟客,唔該六點食到八點前交枱!此店名「集眾菜館」,細細間,坐幾十人,非常嘈非常迫,但一定卜滿,亦經常有大群客人企門口搏執死雞。

此店品有極水準,因老闆林集暉就是總廚。而老婆大人林太則為樓面總指揮兼食材買手。朝朝親自推車仔到深水埗北河街街市入最新鮮的貨色,再交老公炮製。

呢對夫婦,看樣子已知捱到抽筋。不過,口碑轟傳,咁好生意,當然收入豐厚,一切值得。少少遺憾,老林要求極高,故很難請到合心意的二廚。結果,真係做瓜自己。

兩年前幫襯過,上周再去,只想食「集眾」幾味招牌菜:豉油王鵝腸、鮮菠蘿拔絲咕嚕肉及鎮店小炒王。後者我認為絕對獨步香江。用料之優,拋鑊之勁,視覺之美 (圖),實在極難找到一間超越佢。各位,搵到,唔該通知聲!
曾智華

hd