任睇No.1
  • 27º
  • 93%
  • 2022年8月19日 星期五

曾智華 - 白切青頭鴨|祿祿無窮

「青頭仔」你聽得多,青頭鴨聽過未?我就未嘞。但未聽過,不等於冇。

小弟有位老同學「遊街H」(喜歡由日到夜在旺角太子及深水埗一帶遊來遊去),退休後,以遊街為樂,揸住架手機,不停影到大家冇留意的「小城風光」。例如,疫情時候,某類人士仍要搵食,否則手停口停,因攞不到政府津貼。點搞?既然唔可以正正當當開門做生意,唯有打出暗號,在樓梯口當眼處吊一支粉紅色光管。

「遊街H」回報,如此艱苦的工作,相信,若冇投訴,公職人員都會隻眼開隻眼閉。事實,H佬所巡的區,甚多粉紅色光管也。

昨日,佢又傳張相來:「肥碌,青頭仔見得多,青頭鴨見過未?」

「未喎!講多無謂,我咁為食,未食過咪好冇面?快快同我斬一隻!」

邊等食邊上網查。咦,果然有青頭鴨噃(圖),此鴨原名青頭潛鴨,活動於叢林環繞的湖泊池塘江河,主要生長在亞洲。

睇睇吓,「遊街H」又彈來一張相,乃在等師傅斬鴨時拍下的形容:「青頭鴨體型嬌小,頭頸頂着一圈綠得發亮的細毛,在湖面自由飛翔覓食,具藥用價值,清熱滋陰……肉質細嫩清甜……」讚到天上有地下無。

半小時內, H佬已送到白切青頭鴨一隻,收費二百幾。

一咬,冇乜驚喜但都幾好,收貨。你想搵,去太子基隆街六十五號啦!
曾智華

hd