任睇No.1
  • 28º
  • 70%
  • 2022年9月24日 星期六

曾智華 - 加幾多才有士氣呀|祿祿無窮

超哥上場做特首,完全無蜜月期,一坐低,立即出現「燙手薯仔」(Hot Potato),正是上手林鄭月娥大腳傳中的公務員加薪幅度。

行政會議通過公務員調整薪酬方案,高、中、低一刀切,加二點五巴仙。

從來,一講錢就有矛盾,因牽涉利益也。每個人皆有私心,所以,自然反應也由切身利害出發,正常現象,但誰定冇對錯標準。

前日新聞報道,各個公務員工會,見完公務員事務局局長,一律好似㷫過焫雞,揚言唔接受加幅,要求直接見特首。

你咪以為「完善選舉制度」後,社會必定步入和諧,同心協力為大局。當然唔會!今次加幅爭拗,肯定只屬第一單,且看特首點拆。

因為,公務員有公務員睇法,咁,市民大眾又如何?昨天小弟在茶記就聽見幾個的士大哥鬼殺咁嘈。

肥A:大佬呀,份工無風無浪唔驚炒魷又有增薪點,如今再加二點五%,真係羨慕死人呀!若果我有咁調整,舌累飯應啦。班大佬知唔知外邊世界幾艱苦㗎!

高B:咪係!過去兩年幾,旅遊、零售、飲食、運輸⋯⋯包括我哋的士,有啲冇工開,有啲減人工、有啲被炒⋯⋯一樣要死頂生活支出。政府收入少晒,已陷入結構性赤字,重榨佢?

矮C:公務員最過癮成日話冇士氣,士氣係乜嚟㗎,各行各業有冇人關注同一味嘢呢?
曾智華

hd