任睇No.1
  • 26º
  • 94%
  • 2022年8月19日 星期五

曾智華 - 恆仔的櫻花信玄餅|祿祿無窮

上周六早上,攞車到九龍灣原廠Check,職員話兩小時搞掂。點消磨呢?

有嘞,立即去肥韜間大榮華歎茶也可。

飛的去,咦喂,乜換咗招牌?既來之則食之。早上十點開門,冇乜人,正!悠悠閒攤開報紙,點咗必食的蝦餃燒賣腸粉及錦鹵雲吞。

在毫無特別要求下,略有驚喜噃,全部點心皆高水準。於是,向身邊的肥妹老婆講:「正嘞,以後多一處地方歎茶。工廠區,星期六,夠靜侷,又有停車場,收費街坊水平,今日一個好發現!」

歎歎吓,經理埋嚟話:「碌Sir,點心師傅想畀個甜品櫻花信玄餅你試試問意見!」

「我可以試,但錢照畀!」此乃個人原則,絕不接受「免費午餐」。小弟喜歡舖舖清,好就讚,唔好,以後拜拜,江湖兩相忘,絕不欠人情。

結果,甜品奉上,非常精緻,由一個日式玻璃器皿盛上。打開,嘩,好鬼靚(見圖),真係唔多捨得食,擺明廚師花咗不少心思,似藝術品多過似食品。

試啖先,微甜冰涼,口感相當好。

此時,有一穿廚師制服年輕人走近:「碌Sir,我叫林智恆,恆仔,入行二十年,日本迷,好希望將點點東洋視覺美感融心中式點心中。如今正在不斷研發。一到某個水平,再通知你來打分好嗎?」

好好好,咁有誠意又有心的專業點心師傅,我一定支持,後會有期!
曾智華

hd