曾智華 - 核突投注站全將消失|祿祿無窮

任何人、事、物,面對市民的,都有個公眾形象。冇人會變態到想自己形象差劣的,所以由國家到大集團到名人,不少皆聘有公關高手替自己塑造形象,以在普羅大眾心目中留下良好感覺。

這個,本屬普通常識,但非人人皆懂,尤其是初出茅廬者,可能一嚿雲。

多年前,小弟負責管香港電台第二台,全部年輕人,當然朝氣勃勃玩得做得,但有個別人生經驗淺薄的,則腦袋未開竅。

一次,某偶像DJ「A仔」做咗破壞形象行為,於是拉佢入房「訓斥」。年少氣盛又唔明,唔忿氣回應:「碌Sir,又唔係犯法,點解唔做得?」

「簡單,A仔,你咁受歡迎,點解?因有電台提供舞台畀你表現。你亦是電台的代表人物,故一言一行,也應顧及電台形象及觀感,不能以為唔犯法就乜都可以做!舉例,若你見到某高官着人字拖橡筋褲梅菜背心咬口煙,痞在投注站門外爛撻撻刨馬經,佢有冇犯法?冇!但如此,等於嚴重破壞政府形象,你話係咪應該即炒?」

「…我明嘞!」DJ仔頭耷耷行出房。

事實,以前的投注站乃「核突佬」集中地,人人粗口橫飛,吞雲吐霧,咁搞,邊有斯文人尤其淑女願意進入呢?不過……變變變,近兩年變到「得人驚」!昨天行過九龍城投注站,真係「哇」的一聲,乜可以型成咁呀?
曾智華
更多文章