任睇No.1
  • 26º
  • 94%
  • 2022年8月19日 星期五

曾智華 - 主體官員解說不足|祿祿無窮

上屆特首林鄭離任前,接受N個訪問,訴說自己其實做得幾好(哈哈,自己讚自己! )。對於「遣返條例」結局,佢拋下一句震撼官場批評:「主體官員解說不足!」

其實,所有高官皆知,任何政策,影響到整個社會的,為安全計,理應先作全面諮詢。

點解要咁?因官員多數「離地」,愈高官愈離地,你睇林鄭唔識用八達通、唔識買廁紙,已知由呢類腦袋度出嚟的政策,幾咁危險!

所以,政壇老叔父教落,未推出政策前,幾大先由AO小組反覆自己「踢蹺」,腦震盪一番。然後,再向業內人士及持份者(stakeholder)全面諮詢,以免上到立法會俾人鋤低。

個個掌權者其實個心都想事事由上而下,一錘定音,我話咁就咁,免煩,你話幾過癮。

不過,社會由無數不同思想、教育、利益、信仰、品味、財力……者組成。任何政策,若得不到大部份市民支持,或起碼接受,點推?夾硬嚟必惹反彈,製造不安。

香港既然已經「由亂入治」,就一定唔好再走返轉頭。醫務衞生局局長盧寵茂,做慣名醫,在手術室當然大晒,我話咁就咁,我係專家你哋唔係!

不過,從政、做官,你想鑑粗推個紅黃碼而唔事先諮詢?唉,一講已輿論加民意起哄,提出N咁多質疑。
  盧局長,不爭朝夕,蛋糕焗熟先上枱啦!
曾智華

hd