任睇No.1
  • 29º
  • 78%
  • 2022年10月3日 星期一

曾智華 - 的士大佬手機陣|祿祿無窮

政府制訂新政策,當然要想過度過啦。不過,Timing總不能太落後於形勢。

二○一四年開始,我每年都出外旅遊或工作十次八次。赴機場,多數會搭的士。

每一次旅程,都似在搭「嚇破膽過山車」!因司機大佬日日月月無數次揸同一條路,當然知道邊度捉快相,邊度可以踩盡。

於是,一有走雞地段,嘩,分分鐘百二咪以上,真係心血少啲都唔掂。

試過要求司機收慢:「大哥,唔係好趕,可否慢啲?」多數答曰:「唔怕喎,我手車好掂,百分百安全㗎,放心啦!」

大佬,你自己「較飛」好啦,點解拉埋我落水?

所以,我早早求神拜佛,唔該政府成條機場路安裝快相機捉超速。事實,單單機場路嘅意外,皆杰撻撻,多撞死人!

另一樣,又係「攞膽」。機場的士司機,十之六七,乃「千手觀音」,車頭放六至八部機閒閒哋,一邊揸一邊take order。試過幾次,離譜到雙手離軚抄號碼,直至車「跣」過線才修正!

一直好奇,點解運輸署及警方交通部會容忍呢類情況發生?點解咁多年都唔做嘢?

等呀等,終於等到嘞。政府遲到好過冇到,提出建議立法,禁止所有車輛司機在車頭放置兩部或以上電話,並考慮禁止司機在車輛移動時,觸碰屏幕使用電話。

唔好再拖嘞,快快脆一二三立法啦,好多車禍因以上兩點而起㗎!
曾智華

hd