任睇No.1
  • 26º
  • 94%
  • 2022年8月19日 星期五

曾智華 - 磨人的收視率|祿祿無窮

屋漏更兼逢夜雨,TVB股價昨創新低,跌破四蚊雞!

無記宣佈不再公佈收視率,傳媒業內人士,個個都窒一窒。

香港地,打過TVB工者(包括小弟),必過十萬人,事實,由六十年代開始,TVB就是收視霸主,無一個台是對手。

麗的電視曾經七八年逼近,亞洲電視亦一度以《今日睇真啲》及《百萬富翁》拉平均勢,不過全都曇花一現。無記只要一發力,或以相同節目對撼,對手一定散, 捱唔長。

所以,TVB非常熱衷公佈收視,因鋪鋪贏到開巷,當然要曬吓個唯我獨尊勢頭。

點知,搞搞吓,無記品味與香港人,尤其年輕一代,愈行愈遠,節目不單冇新意,兼且,製作水平,一蟹不如一蟹。

這個,差不多已是香港人的共識。

昨晚與幾位前TVB的製作老友共聚,雖則大家不打無記工,但仍然有點忿忿不平——點解製作水平會滑落到如廝地步?究竟內內外外發生咗乜事?究竟重有冇得醫?

做過商業傳媒者皆知,電視台要搵生意,廣告叫價,有乜基準?就是靠收視率。故此,呢項壓力,極之磨人。因為,今日的成功,明日已無效!所以,電視人揸住份收視報告,日日有得震冇得瞓,但,仍要「面對現實」。

如今,無記唔玩呢瓣,是精明定愚蠢?睇睇外間反應及股價,已知此決定有幾「英明」嘞。
曾智華


hd