任睇No.1
  • 30º
  • 71%
  • 2022年10月6日 星期四

曾智華 - 一定要入「富豪會」|祿祿無窮

任何行業,都要生生不息,栽培新人,才可延續發光發熱。每個行業栽培「未來棟樑」的方法,也有不同。

與英國大集團退休高層碰杯,正正談到佢個超級集團,如何栽培「未來大班」。

首先,當然要拔尖!即在富豪子弟就讀的外國名校(美國長春藤),以及香港大學選榮譽畢業生。呢班精英背景,最易揾生意,因物以類聚,同班者,多將成為政府或各大機構領導層,同聲同氣「圍威喂」。有乜事,打個電話已搞掂,即先買起佢地龐大人脈網。

然後,一定要培植其「虛榮心」,努力追求身份、地位及財富,夢想住大屋、揸靚車,打入上流社會。有「虛榮心」,就有奮鬥心。故此,一定不可躺平,倒轉要愛威!

同時,公司也要為班Management trainee搭個靚台。當做到咁上下,人事部就會搵佢哋,畀一堆申請表揀填,包括馬會、哥爾夫球會、遊艇會、鄉村俱樂部⋯⋯

點解?簡單,你唔入會,點接觸到富豪一二三代,同佢哋「埋堆」揾生意?

大富豪們,當然出入名牌會所,難道似我咁——在土瓜灣九龍城茶記行出行入咩。

好嘞,「谷」你入咗會,虛榮心更有進冇退,必自動搶韁發奮,毋須落鞭。

就咁樣,公司一步步替你鋪黃金路。不過,百駿競走,通常十個起跑,只有一個做到大班!
曾智華

hd