任睇No.1
  • 29º
  • 80%
  • 2022年8月8日 星期一

曾智華 - 葉劉對腳趾大信心|祿祿無窮

大群退休公務員聚舊,開心到爆,當然八吓呢個,窒吓嗰個。不過,人人有分寸,知道邊啲可以曝光,邊啲打死都唔再講!

其中之一個話題,為女高官的裝扮。「淑女S」八十年代入官場,見盡第一代冒起女高官,例如陳方安生、俞宗怡、林鄭月娥⋯⋯

女高官衣着,有一定的「不成文規定」,例如應該着裙,但要過膝,鞋要密頭的。

偏偏,有個女高官完全冇興趣遵守,我行我素。邊個?正是今天的行政會議召集人葉劉淑儀。佢早早已對自己身材信心爆棚。所以,你穿過膝裙?佢就穿迷你裙;你穿密頭鞋?佢就穿略帶性感的露趾涼鞋。

小弟八二年初遇Regina,其時,佢協助上司鍾逸傑推廣地方行政,承港英政府命,大力搞區議會普選,引入民主。為軟銷,要求香港電台搞歌星騷宣傳。

上廣播道開會時,真誇張,短裙長靴,再揸架開篷跑車,招牌墨鏡當然掛臉上,大力踩油掟彎入停車場,好鬼型。

「淑女S」又爆阿姐心態:「佢呀,對自己的長腿及腳趾尤為自豪,所以,經常在漫不經意情況下大晒特晒,大家上網睇睇佢啲相,再相比其他女高官的相,就知佢幾出位嘞!」

難怪,幾年前葉劉上電台訪問時,試過失驚冇神將「玉腿」彈出,「益」(嚇?)到班記者手忙腳亂,幾乎唔識㩒相機掣啦!
曾智華

hd