任睇No.1
  • 26º
  • 92%
  • 2022年8月11日 星期四

曾智華 - 《神探大戰》應換導演|祿祿無窮

作為一個影癡,尤其鍾情本地製作,故套套都入場。好的,坐到完場。渣的,無謂浪費時間,中途走人,但一定支持港產片。

剛過去的電影金像獎,入圍的,全部優質產品,得獎名單,人人都服。

咁,下一屆又如何?未知。但以近期上映的看,無論《闔家辣》或《七人樂隊》,都冇冠軍相。

雷聲甚大的《神探大戰》又如何。觀眾的感覺,非常兩極化,影評也如是。有的當韋家輝神咁拜。有的,則話套戲無厘頭,扭「橋」扭到失晒步韻,近年絕少這樣俾人極端感覺的電影。

我的看法又如何?韋家輝乃極出色編劇,毋須辯論。佢最犀利為個腦天馬行空,你想不出的,佢可以順手拈來。兼且,套套有絕不平凡的訊息,這方面超晒班。

不過,好編劇,不等於好導演。事實,若佢能與說故事高手導演拍檔,將劇內無限想像空間情節略略拉回凡間,如此,可觀性必定大增,普羅觀眾更易明佢想表達乜。

《神探大戰》太過燒腦。我一邊睇,一邊覺得套戲若由杜琪峰、劉偉強、陳木勝或林超賢等執導,整套戲的效果,必定更佳,更受歡迎。

此片有兩項應可問鼎下屆金像獎。一為動作設計。黃偉亮表現悅目,不少場面處理有神來之筆。

另外,劉青雲肯定影帝大熱,全片癲佬上身,似癲佬過真癲佬,高段數演技示範!
曾智華

hd