曾智華 - 你究竟想去邊?|祿祿無窮

香港地,新樓盤不停出現,個個年代都有不同命名法。六、七十年代的,最為正路,絕少嘩眾取寵。但去到九十年代,已出現不少「暴發」味名字,令人有少少唔慣,連最擅長搵路的的士大佬,間中也一頭霧水。

當年坐過一轉的士,阿伯司機為火爆式人物,但非常健談。全程車,就在批評地產商改名,佢粗豪講:「老友,家陣啲大廈名,離晒大譜,冇紋冇路。有次有條友上車,我問佢去邊,佢用扮晒嘢聲線話——君臨天下。哈,剛剛當天心火盛,咪一句頂佢囉,我問你去邊,唔係叫你扮皇帝呀!」

結果點?今天,你我當然知「君臨天下」乃屋苑名啦。不過,當年在沙漠似的西九,並冇賣出幾多單位,的士大哥唔識,倒也正常。

好嘞,到近兩年,更是「番鬼佬」上身,不少樓盤,連中文名都冇,例如會德豐的Koko Hills、長實的Sea to Sky、永泰的OMA by the Sea、新地的Wetland Season Park、市建局的One Soho……

昨日跳上的士,哈哈,位大佬又哦:「阿哥呀,班地產商搞乜㗎,香港回歸二十五年啦,仲咁鬼懷念鬼話?竟然紛紛將大廈名變英文,真搲晒頭!昨日接個客,佢話想去粉嶺One Innoval Archway,我識碌竹咩!」
曾智華

hd