曾智華 - 魚肚撞入牛蔔腩|祿祿無窮

  美食,我所欲也。但美食不會從天而降,食神也絕少主動敲門,咁點搞?


理所當然,主動出擊!其中重中之重,為結交全城「為食鬼」,互通消息,互相鑽研。


鑽研乜?鑽研如何將普通菜式的食味及賣相,提升多一個至幾個層次。


老友,蘿蔔炆牛腩,你一定食得多,咁,點可以玩出另一個境界?


寶勒巷「瑪寶鮮」老闆Andy,乃資深為食鬼,不但愛食,更有燃燒的欲念去研發新菜。一得,即call我去分享,看看能否推出。


上周,食神又到,Andy來電:「碌Sir,經過幾日不停改良,撚咗味清湯蘿蔔魚肚炆蝴蝶腩,來試試評分得嗎?」


小小牛腩硬知識:牛腩就是牛胸腩(Brisket),可分以下部份——坑腩(牛味最濃)、腩底(粗而韌,只宜煲湯)、腩角(充滿軟膠質,非常爽脆)、挽手腩(最正一部份,味濃煙靭)、爽腩(又名崩沙腩或蝴蝶腩,牛肚的腩位,因有塊薄軟膠質,故爽軟不硬)。


Andy做法,與傳統蘿蔔炆牛腩無大分別,最重要蘿蔔優質,牛腩揀手,足夠火路,如此,呢煲牛蔔腩已冇得輸。


神來之筆為加入魚肚。眾所周知,其實魚翅、魚唇、花膠及魚肚本身冇味,但一混入上等濃湯,一索,咁就撞出彩虹矣。


今次呢煲嘢睇得又食得,幾時推出就唔知嘞。
曾智華
更多文章