任睇No.1
  • 26º
  • 94%
  • 2022年9月30日 星期五

曾智華 - 向小狗學習—躺平|祿祿無窮

呢幾年,世事混亂,一時社會運動,一時疫情爆發,一時俄烏大戰,一時又台灣環島軍演。身邊不少人出現情緒病,因擔心呢樣又擔心嗰樣,搞搞吓,搞出個抑鬱症,覺得人生無望,唔知點行落去。

抑鬱症乃一種病,要睇精神科醫生,服藥,愈早愈好,藥到病除(我有親身體驗,最佳例子),以免心理影響生理,令免疫力大降,到時,就會不停被細菌病毒欺負!

過去幾年,小弟不停與身邊朋友,或被轉介者,分享如何能在情緒病中抽身而出。

當中有三項可做的,第一是多運動。因為運動能增進血液循環,兼且分泌安多酚,令人會「天然開心」。

第二項是多唱歌和跳舞。因音樂刺激體內快樂荷爾蒙,可以令人短暫忘憂。

第三是養寵物。寵物是造物主賜給人類的最佳朋友。例如小狗,樣貌隻隻天生可愛。無論跑跑跳跳,甚至睡着,都是一幅幅卡通畫面。

人存在意義其中一種,正是每天起牀有人/動物期待着你的出現。小狗每天只食、玩、瞓,不會記仇,只會親你,所以,真是人類最佳朋友。情緒低落時,佢會默默在你身邊陪着,不會囉囉嗦嗦,很是療瘉。

人類應向小狗學習的是,天跌落嚟當被冚。任何不能改變的現實,一於話知佢,只集中食、玩、瞓,然後躺平。船到橋頭自然直,擔心也改變不了事實,由他去吧!
曾智華

hd