曾智華 - 好鬼得人驚|祿祿無窮

呢個世界,乜嘢奇人都有。正常人,絕難理解佢哋心態。

舉例,剛剛獲頒健力士紀錄大全「有史以來最長的女性雙手指甲」證書的得主,一見就令我嚇一驚。

呢位六十三歲的美籍婦人名戴安娜岩士唐(Diana Armstrong),十隻指甲長度驚人,最長的右拇指指甲長達一百三十八點九四厘米,世界紀錄!

長留手甲不剪原因,為佢長女二十五年前猝死,意外前請曾為Diana修甲。這一個最後的服務,激起Diana從此不剪手甲,以示懷念逝去的女兒。

剪指甲,乃小弟每周必做兩次的衞生習慣。自幼家訓,指甲藏垢,唔衞生,故要經常修剪,乾乾淨淨,好品格也。

Diana的相片,令我打冷震,立即聯想,究竟佢每日由起牀一刻到再瞓上牀,究竟點搞的?

數一數我個人的每天生活上用手的需要,早上講起:一、刷牙;二、洗面;三、剃鬚;四、大小二便後清潔;五、換衣服戴口罩綁鞋帶;六、撳電梯;七、駕駛汽車;八、揭報紙睇;九、攪奶茶吃多士切煎蛋;十、入泊車咪錶;十一、做掌上壓及玩健身工具;十二、洗頭沖涼;十三、寫稿;十四、擦手機開電腦……至此,只寫下一個早上要用雙手的活動,若我有Diana咁長手甲就乜都做唔到,點搞?

究竟佢點過活的呢?有冇真人騷直播?
曾智華
更多文章