任睇No.1
  • 28º
  • 81%
  • 2022年9月29日 星期四

曾智華 - 歎日本丁遇靚糖水|祿祿無窮

幫襯茶記,因居住區域關係,我日蒲夜蒲都只來來去去在九龍城、土瓜灣及紅磡。

不過,若有需要,也會越區出擊。尤其剛有要務需赴其他地方,咁,辦公完畢,就會搵間當區著名茶記試試佢。

久聞跑馬地萬興茶餐廳有款出品好掂——沙嗲牛肉日本丁(即用日本版出前一丁)。

前晚,剛要到附近傾合作。完畢,八點幾,肚仔餓餓,「叮」一聲個腦跳出「萬興」兩字,速速徒步而去。

此店格局為普通茶記,但晚上餐牌豐富。聽講,此店位處橫街,但早上有不少半山區及南區富豪專誠揸車而來,正是食個收費四十六元的沙嗲日本丁。

既來之,即食之。上枱,香味撲鼻。夾件牛肉入口細嚼,果然好料,用優質貨,稔稔的充滿牛味。沙嗲醬又如何?一試便知加花生醬開,故口感遠勝普通茶記的沙嗲醬。呢個餐,貴其他餐廳約十蚊,但質素完全唔同,物有所值。當然,用到日本出前一丁,「丁迷」個個是專家,一啖分得開也。

毫無心理準備下,「彩蛋」殺出,正是經理介紹來碗多薑番薯糖水(圖)。真真冇得頂,久未嚐過如此級數靚糖水。最神來之筆為用上大量薑。際此通街新冠病毒肆虐,唔知點解,𡁻完一嚿薑,立即成個醒晒滾晒,免疫力急速提升!
地址:跑馬地昌明街2號
曾智華

hd